Кукмарада «Улыбка» вокаль ансамблен хөрмәтләделәр

Кукмарада 16-17 мартта Түбән Новгородта узган XIV халыкара вокал, хореография һәм театр иҗаты фестиваль-конкурсының Гран-при иясе «Улыбка» вокаль ансамблен хөрмәтләделәр.

«Сез безнең районны лаеклы тәкъдим иттегез. Җиңүегез — тырыш хезмәтегезнең нәтиҗәсе, иң мөһиме — әти-әниегезнең ярдәме, җитәкчегезнең югары профессиональлеге. Без исә, үз чиратында, сезнең үсеш өчен уңайлы шартлар булдыру өстендә эшләячәкбез», — диде район башлыгы Сергей Димитриев.

«Улыбка» вокаль ансамбленә йөрүчеләр һәм аларның җитәкчеләре Лилия Нурмиева район башлыгының Мактау грамоталары белән бүләкләнделәр. Моннан тыш, ансамбльдә катнашучыларга акчалата сертификатлар тапшырылды.

«Безне яхшы кабул иттеләр, шәһәр һәм аның халкының гаҗәеп энергетикасы бик ошады. Иң көчле жюри әгъзалары, искиткеч акустикалы зал... Без „Җәйге авыл кичләре“ дигән татар җырын башкардык. Гран-при — минем уйлавымча, беренче чиратта, хезмәтемне бәяләү. Бик яхшы командам бар, мин бик бәхетле укытучы. Менә бу 19 бала белән эшли башлаганда аларга биш яшь иде. Вокал белән шөгыльләнү бер рәхәтлек, чөнки аның нәтиҗәсе бар», — дип билгеләп үтте ансамбль җитәкчесе Лилия Нурмеева.

Шуны да әйтергә кирәк, әлеге җырның сүзләрен якташыбыз, күп кенә популяр җырлар авторы Айгөл Вәлиуллина язган.

Хәзер коллектив Казанда узачак «Созвездие-Йолдызлык — 2024» XXIV еллык ачык республика телевизион яшьләр эстрада сәнгате фестивале финалына әзерләнә.

Фото: Эльвира Иванова/ «Хезмәт даны»