Кукмара районында яшәүче 25 яшьлек ир кеше талаган өчен хөкем ителгән

Кукмара районында яшәүче 25 яшьлек ир кеше талаган өчен хөкем ителгән. Бу хакта Кукмара районы прокуратурасы хәбәр итә.

«Бу хәл 2019 елның көзендә кичке вакытта Кукмара районының Оштырма-Юмья авылында була. 25 яшьлек ир үтеп баручының кулыннан азык-төлек пакетын тартып алып кача», - дип сөйләделәр район прокуратурасында.

Урланган әйберләрнең бәясе 2 мең сумнан артып китә.

Соңрак җинаятьчене тоткарлыйлар. Хөкем ителүче үз гаебен таныган.

Суд аны 240 сәгать мәҗбүри эшкә хөкем иткән. Хөкем карары законлы көченә кермәгән.