Китапханәдә совет гаскәрләренең Әфганстаннан чыгарылуына 30 ел тулуга багышланган кичә булды

Балалар китапханәсендә күппрофильле лицейның 7в сыйныф укучылары белән совет гаскәрләренең Әфганстаннан чыгарылуына 30 ел тулуга багышланган “Үткән еллар хәтере” дигән хәтер дәресе узды. Чарага Әфган сугышы ветераны Ильяс Шакиров чакырылды. Китапханәче Алсу Баһавиева балаларга Әфган сугышы башлануының сәбәпләре, чит җирләрдә башларын салган якташ солдатлар турында сөйләде. Укучылар Ильяс Мансур улының Әфганстандагы хезмәте, андагы авыр шартлар, солдатларның һәм офицерларның үзара хезмәттәшлеге, сугыш барышы турында игътибар белән тыңлады, үзләрен кызыксындырган сорауларны бирделәр. Әфган сугышыннан кайтмаган барлык сугышчыларны бер минут тынлык белән искә алдылар.