Камышлы авылында һәйкәл ачылды
Чара азагында катнашучылар һәйкәл янына чәчәкләр салдылар, бер минут тынлык белән батырлар рухына хөрмәт күрсәттеләр.
Камышлы авылында истәлекле һәм дулкынландыргыч вакыйга узды — Бөек Ватан сугышы геройлары һәм хәрби хәрәкәтләр ветераннары хөрмәтенә һәйкәл тантаналы рәвештә ачылды. Бу изге чарага район башлыгы урынбасары Резеда Гаянова, Березняк авыл җирлеге башлыгы Рөстәм Шәрипов, авыл халкы һәм ерак-якыннан килгән кунаклар җыелды.
Тантана барышында сугыш кырларында батырлык күрсәткән, илебезнең азатлыгы өчен гомерләрен биргән каһарманнар искә алынды. Аларның исемнәре, батырлыклары бу һәйкәлдә мәңгеләштерелеп, киләчәк буыннар өчен рухи маяк булып калачак.
Чыгыш ясап, Резеда Гаянова бу вакыйганың әһәмиятен ассызыклады:
«Без бүгенге тыныч тормышыбыз өчен гомерләрен кызганмаган каһарманнарыбыз алдында баш иябез. Бу һәйкәл — аларга карата безнең ихтирамыбыз, рәхмәтебез билгесе. Ул безне берләштерә, тарихыбызны онытмаска, Ватаныбызны сакларга чакыра,» — диде ул.
Чара азагында катнашучылар һәйкәл янына чәчәкләр салдылар, бер минут тынлык белән батырлар рухына хөрмәт күрсәттеләр. Камышлы авылында ачылган бу һәйкәл халык хәтеренең, батырлыкка һәм Ватанга тугрылыкның символы булып озак еллар хезмәт итәр.
Фото: Ризилә Корбанова/ «Кукмор-информ»
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia
«Кукмор Татарстан» Telegram-каналга язылыгыз
Галерея
Оставляйте реакции
Нет комментариев