8 яшьтән 17 яшькә кадәрге балалы гаиләләргә яңа төр пособиеләргә гаризалар 1 майдан кабул ителә башлый

Аз керемле гаиләләрдә тәрбияләнүче 8 яшьтән 17 яшькә кадәрге балаларга яңа түләүгә гаризалар кабул итү 2022 елның 1 маенда старт ала. Пособиене 1 апрельдән билгеләячәкләр. Ягъни майда гариза биргәннән соң, гаилә берьюлы ике ай - апрель һәм май айлары өчен тиешле сумманы алачак. Апрельдә балага 8 яшь тулган булырга тиеш.

Пособиене түләү гаиләдә уртача җан башына керем яшәү төбәгендә кабул ителгән яшәү минимумыннан кимрәк булган очракта билгеләнәчәк.

Яңа пособие, гаиләдәге керем күләменә карап, яшәү минимумының 50, 75 яки 100 процентын тәшкил итә. Түләүнең база күләме – 50 процент, ил буенча уртача – 6150 сум. Әгәр дә бу түләүне исәпкә алып та гаиләдә керем яшәү минимумыннан ким булса, пособие төбәк яшәү минимумының 75 процент күләмендә билгеләнәчәк. 75 процент күләмендә пособие билгеләп тә  гаиләнең җан башына уртача керем күләме яшәү минимумыннан азрак кала икән, ул вакытта балага төбәктә яшәү минимумының 100 проценты күләмендә максималь пособие билгеләнә.

Исегезгә төшерәбез: моңа кадәр 8 яшьтән 17 яшькә кадәрге балаларга түләүне бары тик ялгыз ата-аналар гына рәсмиләштерә ала һәм әлеге пособие күләме төбәктә яшәү минимумының 50 процентын тәшкил итә иде.

Россия Пенсия фондының сайтындагы гражданинның шәхси кабинеты аша дәүләт хезмәтләреннән, Пенсия фонды сервисларыннан файдаланыгыз.

Белешмә өчен телефон – 074.

Фото: МА «Татар-информ»