Кукмарада Җиңү көне бәйрәм ителә

Ризилә КОРБАНОВА, 9 май 2026 - 15:11

1095

Бу көн Кукмара халкы өчен хәтерне яңарту, батырларны искә алу һәм киләчәк буыннарга тыныч тормышның кадерен аңлату көне булып истә калыр.

Бөек Җиңү көне уңаеннан Кукмара шәһәрендә тирән мәгънәле һәм күңелләргә үтеп керерлек чаралар узды. Көн иртән Дан Аллеясендә — мөселман һәм православ зиратлары территориясендә — батырлар истәлегенә хөрмәт күрсәтүдән башланды. «Җиңү паркында» узган митингта сугыш кырында ятып калган каһарманнар, хәрби хәрәкәтләр ветераннары искә алынды. Чәчәкләр һәм веноклар салу мизгелләре һәркем күңелендә тирән дулкынлану уятты.

Аннары бәйрәм рухы шәһәр урамнарына күчте. Коллективларның Ленин урамы буенча тантаналы йөреше Кукмара халкын бердәмлек һәм горурлык хисләре белән берләштерде. Кулларда — байраклар, күкрәкләрдә — ветераннарга рәхмәт, йөрәкләрдә — Җиңү рухы иде.

Чараларның төп өлеше Комсомол мәйданында дәвам итте. Биредә «Җиңү, син һәркемнең йөрәгендә» дип исемләнгән театральләштерелгән митинг узды. Сәхнәдәге чыгышлар аша сугыш еллары михнәтләре, фронттагы батырлыклар һәм тыл хезмәтчәннәренең фидакарьлеге чагылдырылды. Тамашачылар һәр чыгышны тын да алмый күзәтте, күпләрнең күзләрендә яшь бөртекләре күренде.

Бәйрәмне районның балалар коллективлары концерты бизәде. Яшь буын башкаруындагы җырлар, биюләр һәм шигырьләр Ватанга мәхәббәт, тынычлыкның кадере һәм батыр буынга рәхмәт хисләрен тагын да көчәйтте. Балаларның ихлас чыгышлары һәркем күңеленә өмет һәм якты киләчәккә ышаныч өстәде.

Бу көн Кукмара халкы өчен хәтерне яңарту, батырларны искә алу һәм киләчәк буыннарга тыныч тормышның кадерен аңлату көне булып истә калды.