Фото: Бүген төнлә чыккан көчле җил Кукмара үзәк дәваханәсенең бала тудыру корпусы түбәсе калаен кубарган

"Мәскәү вакыты белән 9.55 сәгатьтә көчле җил Кукмара үзәк дәваханәсенең бала тудыру корпусы түбәсе калаен алып атты, зыян килгән мәйдан 70 квадрат метр тәшкил итә. Авырулар эвакуацияләнмәде", - дип хәбәр итте районның янгын-коткару часте начальнигы Ильмир Хәбибрахманов.

Булган мәгълүматларга караганда, зыян күрүчеләр юк. Хәзерге вакытта түбәне ремонтлау бара, моңа 12 кеше һәм 3 берәмлек техника, шул исәптән МЧСтан 2 кеше һәм бер техника җәлеп ителгән. Ремонт эшләре кичкә төгәлләнер дип көтелә.