Кукмара Дәүләт автоинспекторлары юл йөрү кагыйдәләрен бозган электр самокатында йөрүче балаларга кисәтү карточкалары тутырган

Карлар эреп, кояш турырак карый башлауга, юлларда бер-бер артлы велосипед-самокатчы балалар күренә башлады. Тиешле урыннарда гына хәрәкәт итсәләр, бик яхшы да бит, алар күп вакыт автомобиль юлына да чыга. Узган атнада электр самокатында җилдерүче ике укучы бала да юлда тәртип бозган өчен район Дәүләт автоинспекторлары кулына эләккән.

«Әлеге укучылар белән кисәтү әңгәмәсе уздырылды, „Тукта, тормышыңа куркыныч яный“ дигән карточкалар тутырылды һәм балигъ булмаганнар эше буенча комиссиягә җибәрелде. Балаларга электр самокаты кебек кыйммәтле бүләкләр ясаганчы әти-әниләр иң элек аларның иминлеге турында уйласын иде. Чөнки 14 яшькә кадәрге малай-кызлар самокатта да, велосипедта да автомобиль юлына чыгарга тиеш түгел. Ә менә 14 яше тулганнарга рөхсәт ителә. Анда да тиешле экипировка булырга, шәхси хәрәкәт чарасының (СИМ), әйтик, электр самокатының тизлеге сәгатенә 60 чакрымнан артмаска тиеш. Кагыйдәләрне үтәмәүчеләргә штрафлар карала. Без юлларда һәрдаим рейдлар, мәктәп, балалар бакчаларында тематик чаралар уздырабыз, аңлату әңгәмәләре алып барабыз. Әмма әти-әниләр дә балаларының кайда, кемнәр белән булуын контрольгә алсыннар, аеруча кече яшьтәгеләрне күзәтүчесез калдырмасыннар иде», — ди район Дәүләт автоинспекциясе җитәкчесе Фирдүс Фәхретдинов.

Җитәкченең сүзләренә караганда, узган ел районда велосипедчылар катнашында 3 юл-транспорт һәлакәте теркәлгән, бер олы кешенең гомере өзелгән, икенчесе төрле тән җәрәхәтләре алган. Шулар арасында бер бала да бар, бәхеткә каршы, ул зыян күрми. 

Велосипед, самокатта йөрүчеләр юлның икенче ягына җәяүле юлы аша велосипедтан төшеп һәм аны этеп чыгарга тиеш булса да, кызганыч, кайбер шук-шаян малайлар закон таләбен колагына да элми. Борылышмы, урам чатымы — анда исләре дә юк, каян туры килә, шуннан җилдерә алар. Беркөнне ике велосипедчы да күз алдымда сәүдә комплексы каршына юлны кисеп кенә чыкты. Ул балаларны күреп, йөрәк жу итеп китте. Ярый әле машиналар кызу тизлек белән бармый иде, хәтта бер шофер туктап уздырды үзләрен. Балаларның игътибарсызлыклары, кагыйдәләрне үтәмәүләре, каядыр ашкынулары бәлагә генә китерә күрмәсен!

Скутер, мопед һәм мотоциклчылар да көн салкын дип тормыйлар, юлда берән-сәрән булса да күренәләр. Автоинспекторлар мототранспорт ияләрен кагыйдәләрне үтәргә чакыра.

1. Мопед-скутерлар белән идарә итү өчен «М» категорияле йөртү таныклыгы булырга тиеш. Моның өчен мәҗбүри шарт булып 16 яшькә җитү тора. Мотоцикл руле артына утыру өчен 18 яшь тулырга һәм «А» категорияле таныклыкка ия булырга кирәк. 

2. Тиешле тизлекне саклау, махсус экипировка: шлем, мотокуртка, перчатка, махсус аяк киеме булу мөһим.

фото: архив, Эльвира Иванова/ «Кукмор-информ»