Узып баручы ел рекордлары һәм җиңүләре

Районыбызның авыл хуҗалыгы хезмәтчәннәре быел көндәлек сөтне 300 тоннага җиткерде, Кукмара республикада беренчелеккә чыкты. Шулай ук быел районыбыз игенчелек тармагында да үзенең эшли белүен күрсәтте: һәр гектардан уртача 43,2 центнер бөртек җыеп алып, республика районнары арасында беренче өчлеккә керде. Елның-елында мул уңыш үстерә торган кара туфраклы районнарны да уздырып, үзенең ташлы басуларында шуның кадәр икмәк иккән авыл халкына: «Афәрин, егетләр!» диясе генә кала. Хәтта кайбер басулар 60-70 центнерга кадәр уңыш бирде. 

Быел газетабыз үзенең 90 еллыгын билгеләп үтте. Язын үзизоляция чорында да бер көн эштән тукталмадык, райондашларыбыз белән элемтәләрне өзмәдек. «Демография – безнең киләчәк» дигән проектыбыз белән дәүләттән 300 меңгә якын сумлык грант отуыбыз күп кенә үрнәк гаиләләрнең тормышын бәян итәргә мөмкинлек бирде.