Татарстанда фурага бәрелгән автомобильнең йөртүчесе һәлак булган

Кичә кичке сәгать 11 тирәсендә Татарстанның Чистай районы Казан-Оренбург юлында, Каргалы авылы янында, юл-транспорт һәлакәте булган, дип яза «Татар-информ» МА.

«Татар-информ»га шаһитлар сөйләгәнчә, Huyndai һәм Самара өлкәсеннән килгән Skania фурасы юл бүлешә алмаган. Каты бәрелешүдән соң, беренче автомобиль металл өеменә әверелгән, ә йөк машинасы юл кырыена төшеп киткән һәм ауган.

Республика Дәүләт автоинспекциясе хәбәр иткәнчә, якынча мәгълүматлар буенча, Hyundai автомобиле йөртүчесе имин тизлек режимын сайламаган, каршы як полосага чыккан һәм Scania автомобиле белән бәрелешкән.

«Юл-транспорт һәлакәтендә җиңел автомобильнең йөртүчесе урында ук үлгән. Фура йөртүчесе медицина ярдәменнән баш тарткан», - дип белдерә һәлакәт шаһитлары.

фото: Республика Дәүләт автоинспекциясе