Кукмара районында каты янгын чыккан

7 июльдә, иртәнге сәгать 4.57дә районыбызның Трыш авылындагы торак йортларның берсендә янгын чыга. Янгын сүндерүчеләргә әлеге йортның күршеләре сөйләвенчә, өйдә өч кеше була. Чыгу юлын ялкын телләре камап алганлыктан, алар ишектән чыга алмыйлар. Күршеләре, кул астында нәрсә очрый, шуның белән тәрәзә пыяласын ватып, пенсионерларга аннан чыгарга булыша һәм аларның гомерен саклап кала. Кукмара янгын-коткару частеннән алынган мәгълүмат буенча, янгын 20 минуттан сүндерелә.