Кукмара районы авыл хуҗалыгы предприятиесендә бозау урлаганнар

Кукмара районы авыл хуҗалыгы предприятиеләренең берсендә бозау урлаганнар. Бу турыда район эчке эшләр бүлегенә хуҗалык җитәкчесе хәбәр иткән. Җинаять урынына килгән полиция хезмәткәрләре шуны ачыклаганнар: 18 октябрьдән 19ына каршы төндә явыз ниятле кешеләр хокуксыз рәвештә ферма территориясенә кереп, 140 килограммлы бозауны урлаганнар. Әлеге факт буенча җинаять эше ачылган. Полиция хезмәткәрләре бу турыда нинди дә булса мәгълүмат белүчеләрне 2-70-80, 2-65-36 яки 02 телефон номерларына хәбәр итүләрен сорый.

фото: Рамиль Гали, "Хезмәт даны"