Кукмара 4нче мәктәбе укучылары «Тамчы-шоу»да катнашты

Кукмара 4нче урта мәктәбе укучылары «Тамчы-шоу» интеллектуаль телевизион уенында катнаштылар һәм җиңү яуладылар.

«Тамчы-шоу» интеллектуаль уенында Кукмара һәм Әлки районы укучылары көч сынашты. Кукмара 4нче урта мәктәбенең 6-8нче сыйныф укучылары Илүзә Кашапова, Динә Гайнанова, Зифа Йөзмөхәммәтова сорауларга дөрес җавап бирделәр һәм география, татар теле һәм әдәбияты, тарих фәннәрен яхшы белүләрен күрсәттеләр.

Укучыларны уенга Кукмара 4нче урта мәктәбенең татар теле һәм әдәбияте укытучылары Зөлфия Галимуллина, Динә Йөзмөхәммәтова әзерләделәр.

Җиңүчеләрне котлыйбыз, алдагы ярышларда да уңышлар телибез!