Капланган “Лада”да ике ир-ат имгәнгән

Мөслим районында әйләнеп капланган “Лада”да ике ир-ат зыян күргән. Бу хакта “Татар-информ” агентлыгына Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә хәбәр иттеләр.

Югары Табын авылы янында килеп чыккан һәлакәт турында бердәм 112 экстрен хезмәте номерына җомга, 18 майда, төнге унберләр тирәсендә шаһитлар хәбәр иткән.

Урынга килгән янгын сүндерүчеләр юл кырыенда капланган “Лада Калина”ны күргән. Шунда ук җимерелгән машинаның аккумуляторын сүндергәннәр.

Машинада булган 37 яшьлек йөртүчесен һәм 37 яшьлек пассажирын коткарганнар. Ике ир-ат та күпсанлы җәрәхәтләр алган, баш миләре селкенгән.