Язмышларны белеп булмый

Язмышларны белеп булмый:

Бүген яхшы, алда яман.

Адым саен төгәлсезлек,

Күз ачтырмый җансыз ялган.

Чирәм түшәп, чокыр казый,

Төшкәнеңне шунда көтә.

Тотып ата, теләмәсәң,

Шул мизгелдә ут та төртә.

Пешкән җирне тозлап юа,

Ачысыннан җаның сыза.

Инде беттем, дигәч кенә,

Авыз ерып, кулын суза.

Өзгәли дә мең кисәккә,

Минем талган бәгыремне,

Сынау арты сынау аша,

Җуя булган кадеремне.

Тукта, язмыш, уйнама син!

Сабырлыгым - сары алтын.

Күзләремнән тамса да яшь,

Йөрәгемдә сүнмәс ялкын!