Районыбызның Туембаш авылы турында өр-яңа җыр дөнья күрде

Соңгы вакытта районыбыздагы күп татар авылларының үз җырлары барлыкка килде. Үткән саннарның берсендә "Арбашым" дигән җыр белән таныштырган булсак, бу юлы "Туембашым - туган ягым" дигәнен тәкъдим итәбез. Җырның авторлары - районыбызның танылган композиторы Илгиз Закиров һәм шагыйрь Харис Мостафин. Авыл сабан туенда тәкъдир ителгән әлеге җыр Вадим Захаров башкаруында аерым диск булып та дөнья күрде.

"Шипр" тауларыңнан, хозурланам карап,

Туембашым - туган якларым.

Күп илләрне күрдем, инде шуны белдем,

Сиңа илтә һәрчак юлларым.

Кушымта:

Җанны сафландырып, айлы манараңнан

Әйтә моңлы азан кич-иртә.

Мәчетебез нуры, ныклы иман юлы,

Халкымны шул бәхетле итә.

Көтү көтеп йөргән, Киңалан болыны

Күңелемнән китмәс мәңгегә.

Кыек юл үзәне, җиләгенең тәме,

Иреннәрдә тора әле дә...

Кушымта:

Җанны сафландырып, айлы манараңнан

Әйтә моңлы азан кич-иртә.

Синең барлыгыңны тоеп яшәгәндә,

Бәхет өчен миңа шул җитә.

Учларыма алам сагынуга дәва

Бәшәр чишмәсенең сулары.

Гел ашкынып кайтам, туган туфрак тарта

Сиңа илтә мине юлларым.

Кушымта:

Җанны сафландырып, айлы манараңнан

Әйтә моңлы азан кич-иртә.

Синең барлыгыңны тоеп яшәгәндә,

Бәхет өчен миңа шул җитә.

Без утыртып йөргән ак каеннар саклый

Туембашны тузан-җилләрдән.

Безне күпләр белә, бик яратып кия,

Итек-шәлең ерак илләрдә.

Кушымта:

Җанны сафландырып, айлы манараңнан

Әйтә моңлы азан кич-иртә.

Синең барлыгыңны тоеп яшәгәндә

Бәхет өчен миңа шул җитә.

Мәчетебез нуры, ныклы иман юлы,

Халкымны шул бәхетле итә.

Туембашым, миңа шул җитә!

Харис МОСТАФИН сүзләре. Илгиз ЗАКИРОВ көе

фото: http://www.kykmor.ru/node/1393?size=thumbnail