Лубян җирлегендә хисап җыелышы үтте (+фото)

Лубян авыл җирлегендә 2014 елгы эш йомгакларына багышланган хисап җыелышы узды. Иң элек район җитәкчесе Сергей Димитриев әлеге җирлеккә керүче Сәрдәүч авылында булды, кәрҗин үрүчеләр белән аралашты, Лубянда "Авария хәлендәге торак" программасы буенча төзелгән йортны карады, агач эшкәртү цехы, дәваханәдәге ремонт эшләре белән танышты, урта мәктәптә укучылар һәм укытучылар коллективы, урман-техник көллиятендә студентлар белән очрашты.

Мәдәният йортында узган хисап җыелышында исә җирлек башлыгы Рим Фәхрәзиев, урман-техник көллияте директоры Афанасий Данилов, урта мәктәп директоры Илсур Кәшәпов, участок инспекторы Руслан Сираҗетдинов, район прокуроры Минемулла Нәҗипов, район үзәк дәваханәсе баш табибы Равил Халиев һәм башкаларның чыгышлары тыңланды. Район җитәкчесе Сергей Димитриев исә районның 2014 елгы социаль-икътисадый торышы турында сөйләде, максат һәм бурычлар билгеләде.