Кукмарада ЮХИДИ инспекторлары исерткеч эчемлек куллану билгеләре булган ике шоферны ачыклаган

Бүген, 7 июньдә, 7.00 сәгатьтән 9.00 сәгатькә кадәр ЮХИДИ хезмәткәрләре, участок инспекторлары белән берлектә, Кукмараның Магистральный урамында «Тоннель» операциясен үткәрде. Бу хакта районның ЮХИДИ бүлегендә хәбәр иттеләр. 

Рейд барышында юл хәрәкәте кагыйдәләрен бозуның 17 очрагы ачыкланган. Алар арасында түбәндәгеләр бар: иминлек каешларын куллану кагыйдәләрен бозу (9 очрак), укылмый торган дәүләт номерлары булган транспорт чарасы белән идарә итү (3 очрак), техник тикшерү узуны раслаучы диагностик карта булмаган хәлдә транспортта йөрү (2 очрак), балаларны махсус утыргычсыз йөртү (1 очрак).

Моннан тыш, алкогольле эчемлек куллану билгеләре булган ике шофер ачыкланган. Аларның транспорт чаралары штрафлар тукталышына куелган. 

Районның дәүләт автоинспекциясе машина йөртүчеләрне мондый төр күпләп тикшерүләрнең алга таба да алып барылачагын искәртә. 

Фото: архив, Эльвира Иванова/ «Хезмәт даны»