Мәдәният йортында Кукмара районында коррупциягә каршы көрәш эшен координацияләү комиссиясе утырышы үтте

Бүген район Мәдәният йортында Кукмара муниципаль районында коррупциягә каршы көрәш эшен координацияләү комиссиясе утырышы үтте.

Утырыш район прокуроры Рөстәм Мәхмүтовның чыгышы белән башланды. Ул Кукмара муниципаль районында коррупцияне кисәтү һәм булдырмау буенча хокук саклау органнарының 2024 елда эшчәнлеге белән таныштырды. 

Иҗтимагый совет тарафыннан төрле максатчан төркемнәр белән районда үткәрелгән социологик сораштырулар нәтиҗәләре турында район Иҗтимагый советы рәисе Раулә Сәмәрханованың чыгышыннан соң, район җитәкчесе Сергей Димитриев анда күтәрелгән мәсьәләрне җентекләп өйрәнеп, исемнәре аталган һәр оешма-учреждение җитәкчелегеннән алда булачак утырышларда башкарылган эшләр буенча хисап бирергә чакырды. 

Бюджет акчаларын максатчан файдалануга һәм рациональ тотуга эчке финанс контроле кысаларында Финанс-бюджет палатасы эшенең нәтиҗәлелеген арттыру өчен күрелә торган чаралар турында район Финанс-бюджет палатасы рәисе Илнур Сәмигуллин сөйләп узды. 

Җирле үзидарә органнарына һәм ведомство буйсынуындагы учреждениеләргә хокук саклау яисә контроль-күзәтчелек органнарыннан кергән реакция актларын анализлау нәтиҗәләре, ачыкланган җитешсезлекләрне бетерү чараларының нәтиҗәлелеге белән район Башкарма комитетының баш белгече (юристы) Рамил Исрафилов таныштырды.

фото: Лилия Нургалиева, Эльвира Иванова/ «Кукмор-информ»