Кукмарада махсус хәрби операциядә катнашучыларга ярдәм итүче «Ватанны саклаучылар» социаль дәүләт фондының координаторлары белән очрашу узды

Татарстанда махсус хәрби операциядә катнашучыларга ярдәм итү өчен оештырылган «Ватанны саклаучылар» социаль дәүләт фондының Балтачтагы филиалы координаторлары Дилүс Гатиятуллин һәм Гөлүзә Сәгъдиевалар Кукмарада булып, район хакимияте җитәкчелеге белән очраштылар.

«Без Балтач, Кукмара, Саба һәм Теләче районнары белән эшлибез. Төп бурычыбыз — махсус хәрби операция ветераннарына, аларның гаиләләренә, ата-аналарына, һәлак булган хәрбиләрнең гаилә әгъзаларына ярдәм итү. Сораулар социаль, медицина, юридик өлкәгә карарга мөмкин. Гомумән, махсус операция зонасыннан кайткан хәрбиләр, аларның гаиләләрен борчыган сорауларга җаваплар табарга булышабыз», — дип сөйләде социаль координатор Дилүс Гатиятуллин.

Очрашуда җирле хакимият, социаль хезмәтләр һәм координаторларның үзара эшчәнлеге мәсьәләләре каралды. Шулай ук фондка сугыш хәрәкәтләре ветераннары, махсус хәрби операциядә катнашучыларның гаиләләре мөрәҗәгать иткән мәсьәләләр турында фикер алыштылар.

Фото: Эльвира Иванова/ «Хезмәт даны»