Ядегәр мәктәбе укучылары Белем көнен яңартылган бинада каршы алды

Ядегәр урта мәктәбендә дә куанычлы вакыйга. 1 сентябрь көнне белем йорты укучыларны яңартылган бинада каршы алды.

Ике катлы мәктәпнең гомуми мәйданы ике меңгә якын квадрат метрны тәшкил итә. Федераль программа кысаларында үзенең икенче яшьлеген кичергән бинаның түбәсе яңартылган, фасад өлеше эшләнгән, сыйныф бүлмәләре һәм коридорларда идән-түшәм, тәрәзә-ишекләр, җылылык, канализация, җилләтү системасы алыштырылган, агач идәннәр урынына плитә, линолеумнар җәелгән, коридорларда пыяла витражлар куелган.
Мәктәп директоры Рәмис Нуриевның сүзләренә караганда, төзекләндерү 120 миллион сумга төшкән. Шуның 15 миллион сумына җиһазлар алынган.

Быел белем йортында Югары һәм Түбән Шәмәрдән, Тарлау, Ядегәр авылларыннан 115 бала белем-тәрбия алачак. Беренче сыйныфка 12 бала керде.

Бәйрәм тантанасында район башлыгы Сергей Димитриев, Татарстан Республикасы Премьер-министры урынбасары — республиканың авыл хуҗалыгы һәм азык-төлек министры Марат Җаббаров, Татарстан Дәүләт Советы депутаты Римма Ратникова һәм башкалар катнашты.

фото: Алсу Сәләхетдинова/ «Хезмәт даны»