Гаилә, мәхәббәт һәм тугрылык көне алдыннан Кукмара бала тудыру йортында дөньяга килгән сабыйны каршы алу тантанасы узды

Иртәгә, 8 июльдә, Гаилә, мәхәббәт һәм тугрылык көне билгеләп үтелә. Шул уңайдан бүген районның бала тудыру йортында тантаналы вакыйга булды: 1 июльдә дөньяга аваз салган сабый белән әнисен өйләренә чыгардылар. 

Зур Кукмара авылында яшәүче Гөлнара һәм Илдус Әхмәтҗановлар өченче тапкыр әти-әни булдылар. Нәни Ильясның авырлыгы – 3 килограмм 90 грамм, озынлыгы – 50 сантиметр. 

“Менә җиденче оныгыбыз – Ильясны каршы алырга килдек. Улыбыз Илдус гаиләсе белән Якутиянең Удачный шәһәрендә яшәгәннән соң, туган якларына кайтып төпләнде. Ике оныгыбыз шунда дөньяга аваз салган иде. Һәммәсе дә исән-сау, әти-әниләренә миһербанлы, шәфкатьле балалар булып, тигезлектә тәрбияләнеп үссеннәр иде. Елларыбыз тыныч булсын”, – дип, үзенең хис-кичерешләре белән уртаклашты кукмаралы Фирдәүсә Әхмәтҗанова. 

Бәхетле әти-әнине, аларның туганнарын район Башкарма комитеты җитәкчесенең социаль мәсьәләләр буенча урынбасары Айгөл Әхмәтшина, район ЗАГС бүлеге җитәкчесе Зөлфия Латыйповалар котлап, район башлыгының тәбрикләү хатын, сабыйның беренче документын – туу турында таныклык, истәлек бүләкләре, чәчәк бәйләме, Гаилә, мәхәббәт һәм тугрылык көненең символы – ромашка тапшырдылар. 

“Өченче тапкыр әти-әни булу бәхетен татыган хөрмәтле райондашларыбыз! Күпбалалы гаилә статусына кергән көннәрегез белән чын күңелдән тәбриклибез. Сезгә саулык-сәламәтлек телибез, балаларыгыз исән-сау булып, сезне сөендереп торсыннар, күп еллар тигезлектә, бәхетле тормышта яшәргә язсын, гаиләгездә шатлык-сөенечләр бик күп булсын”, - диде Айгөл Әхмәтшина.

Уллары – 12 яшьлек Ислам, 9 яшьлек Искәндәр янына сабый Ильяс та өстәлүенә сөенгән Әхмәтҗановлар киләчәктә футбол командасы туплыйбыз әле, диделәр, шаярып-көлеп. Бирсен Ходай!