Җәннәткә илтүче юл: Бүгенге көндә Кукмара районында өч мәчет төзелә, икесе төзекләндерелә

Районыбызда дин йортлары төзелү турында еш кына ишетеп торабыз. Бүгенге көндә дә Кукмара районында төзелеп килүче өч мәчет бар, икесе төзекләндерелә. 

Әлеге Аллаһ йортлары нинди акчага салына? Бу изге эшләрне башлап йөрүчеләр кемнәр? Кукмара районы имам-мөхтәсибе Рәдиф хәзрәт Тимергалиев белән шул турыда сөйләштек.

– Аллаһка шөкер, районыбызда мөселманнар өчен яхшы яңалыклар, үзгәрешләр бар. Кукмарага Мамадыш ягыннан килә торган юл чатында затлы матур мәчет салына башлады. Аны “Фатиха” дип атадык. Юкка гына андый исем бирелмәде. “Фатиха” сүрәсен Коръәндә ачып җибәрүче буларак беләбез. Географик урыны белән дә шәһәребезгә килүчеләрне каршы алучы булыр дип өметләнәбез. Мәчетнең җире моннан 10 ел элек алынып документлаштырылды, бераз соңрак нигез ташы салынды. Аннан соң проектлары әзерләнде. Мәчетнеке аерым, комплексныкы аерым, һәрберсе 2 миллион 500 мең сумга төште. Төзелешнең быелга планлаштырылган беренче өлешенә 25 миллион сумга килешү төзелде. Ул суммадан 10 миллионы әле түләнмәгән. Проект буенча беренче катны бу елда эшләргә исәпләп торабыз. Шушы арада Үзәк мәчетне төзекләндерү эшләре быелга тәмамланып килә: аның түбәсе алмаштырылды. Киләсе елда диварларын яңарту күздә тотыла.

– Моннан ике ел элек Мәчкәрә авылындагы Беренче Җәмигъ мәчете реставрацияләүгә керешелгән иде. Андагы төзелеш нинди этапта?

– Мәчкәрәдәге дин йортын март аена төзекләндереп бетерергә планлаштырылган. Бу көннәрдә тышкы эшләр төгәлләнеп килә. Суыклар башланганчы тәмамлый алсак, җылылыкны тоташтырып, эчке диварларны матурлауга керешәчәкбез. Матди ягына килгәндә, төзелеш тулысынча Татарстан Рәисе Рөстәм Миңнеханов һәм иганәчеләр ярдәме белән башкарыла.

– Район үзәк дәваханәсе каршында төзелә башлаган “Нәсыйхәт” мәчетенә дә тукталып үтик әле. Аның төзелеше туктатылдымы әллә дип сорап язалар.

– Юк, әлбәттә, туктатылмады. Аскы өлешендә төзелеш бара, шушы арада фундаменты салыначак, быелга җир белән тигезләнеп эшләнәчәк. Проекты буенча ул зур булмаган, ләкин кешене җәлеп итә торган, бик мәһабәт бина булачак дип күздә тотыла. Сыйдырышлыгы 70-100 кешегә исәпләнгән.

– Районыбызның Балыклы авылында халыкка күп еллар хезмәт иткән агач мәчет сүтелде. Яңа дин йорты салыначак, дигән хәбәр йөри.

– Әйе, Аллаһ боерса, Балык­лы авылы халкына да яңа зур мәчетләрне күрергә насыйп булсын. Бу изге эшне әйдәп баручы – “Урал” хуҗалыгы җитәкчесе Газинур Хәбибрахманов. Һичшиксез, бер кешенең тырышлыгы белән генә мондый зур эшне башкарып чыгып булмый. Авыл, район халкы, иганәчеләр зур ярдәмчеләр булып тора. Әлеге бина Балык Бистәсе районының Яңа Арыш авылы мәчете сыман бик күркәм, бик зәвыклы булыр дип торабыз. Аллаһы Тәгалә кушса – Гаеткә, җитешеп өлгермәсә, икенче елның көзенә мәһабәт бинадан авыл халкына иртәнге азан тавышы ишетелер.

– Рәдиф хәзрәт, аңлашылганча, бу төзелешләр барысы да мәрхәмәтле район халкының ярдәме белән башкарыла.

– Пәйгамбәребез Мөхәммәд салләллаһү галәйһиссәлләм: “Мәчет төзелүгә кош оясы кадәр генә өлеш кертсәгез дә, җәннәткә сезнең өчен зур йорт төзеләчәк”, – дигән. Шуңа күрә һәр кеше булдыра алганча үзеннән өлеш кертсә, бакыйлыкка күчкәч тә аңа әҗер-саваплары ирешеп торыр, иншаллаһ. Әмин.

– Әңгәмәгез өчен зур рәхмәт, Рәдиф хәзрәт.