Мәрхәмәтсезлеккә күңел әрни

Әле күптән түгел генә Кукмарабызның 85 еллыгын билгеләп үттек. Бу уңайдан Җиңү паркы каршындагы мәйданда бик матур чаралар гөрләде. Мин дә беренче төркем инвалид булуыма карамастан, авылдан килеп, әлеге тантананы тамаша кылдым. Бик күңелле булды. Тик аннан соң берничә көн вакыт үтсә дә, шунда булган бер вакыйга күңелемә тынгылык бирми. Тамашаны без - коляскалы ике инвалид рәттән карадык. Тәбрикләүләр өлеше беткәннән соң, райондашларның яраткан артисты Фирдүс Тямаев сәхнәгә чыкты. Шунда бар халык этешә-төртешә, халыкны сәхнәдән аерып торучы рәшәткәләрне ачып, алга таба ыргылды. Әздән генә коляскаларны аудармадылар. Ярый әле минем телем бар, үземне яклап ни дә булса әйтә алам, ә яңа танышым авырлык белән генә аралаша, куллары да хәрәкәтләнми. Җитмәсә, бер баланы да шул инвалид каршына рәшәткәгә бастырып куйдылар. Ул баланың әнисе нинди кеше булды икән?! Кешелеклелек сыйфатлары, әйләнә-тирәдәгеләргә бераз булса да игътибар булырга тиештер бит инде ул?! Мондый очраклар онытылмый, күңелдә авыр яра булып уелып кала.

Берничә ел элек пенсия фондының элеккеге бинасына кергәндә яшь кенә кыз борын төбемдә ишекне ябып кереп китте. Тагын бер очрак: кибеттә "сез - инвалид" дип, телефон белән планшетны кредитка рәсмиләштерүдән баш тарттылар. Бәлки безгә телефон башкаларга караганда кирәгрәктер дә әле. Миңа нинди шәһәрләргә генә барырга туры килмәде, әмма бездәге кебек мәрхәмәтсезлекне очратканым булмады. Һәр җирдә булышалар, ярдәм кулы сузалар иде, хәтта тимер юл аша да чыгарып куючылар булды. Тормышта һәркем авыр хәлдә калырга мөмкин бит, бер-беребезне хөрмәт итеп, матур яшәсәк иде.

Миннегөл СЕМЕНОВА, Әсән-Елга авылы