18-19 октябрь көннәрендә Ришат Төхвәтуллин Казан тамашачысына яңа программасын тәкъдим итте. Әлеге тамаша турында тәфсилләбрәк язасы килә.
Шуны әйтергә кирәк: Ришатның тамашачысы бик тугры. Нәкъ шулай, чөнки залда утыручыларның 70-80 проценты аның концертларына кабат-кабат билет сатып алучылар. Хәтта бер үк программасын берничә тапкыр тамаша кылучылар бар. Һәм Казаннан гына түгел, ә Россиянең төрле төбәгеннән, республика районнарыннан да килүчеләр бар. Бу җырчы өчен зур күрсәткеч һәм бәя. Ришатның концертына билетлар бик тиз арада сатылып бетә. Шуңа күрә ул ел да күп тамашачылар соравы буенча, башкалада тагын бер-ике көн концерт куя. Быел да әлеге көн 12 декабрьгә билгеләнгән.
Ришатның яңа программасы "Исеңдәме?" дип атала. Халкыбызның уеннарын, гореф-гадәтләрен, озын көйле моңлы җырларын тагын бер кат хәтердә яңартып утырды тамашачы. Узган сезонның иң популяр җырлары белән беррәттән, быелгы тамашаның "Синнән башка", "Исеңдәме?", "Ярты бәхет кирәкми", "Сиңа кадәр" "Тәрәзәңне ачып калдыр әле" кебек иҗат җимешләрен дә ишеттек. Яңа җырлар да тыңлаучылар күңеленә үтеп кереп, лаеклы урыннарын алгандыр дип уйлыйм.
Җырчының "Тыңлачы, сандугач" һәм башка җырлары тирәсендә барган хәлләр турында кабат-кабат язасы килми, барыбыз да хәбәрдардыр дип уйлыйм. Шулай да концерт саен "Тыңлачы, сандугач"ны сораган тамашачыга ихтирам йөзеннән, Ришат быелгы сезонга җырның яңа вариантын әзерләгән. Көен яңгырату хокукы җырчыда калганлыктан, шагыйрь Рәис Ханнанов махсус аның өчен яңа текст иҗат иткән. Тамашачылар монысын да яратып кабул итте, аягурә басып, алкышларга күмде.
Моннан тыш, концертта тагын бер сюрприз әзерләнгән иде. Тамашачы Ленар Хәбибуллин, сәхнәгә чыгып, алты ел очрашып йөргән сөйгән кызына кияүгә чыгарга тәкъдим ясады. Гөлнара мондый гадәти булмаган мәхәббәт аңлатудан югалып калмыйча, сөйгәненә ризалык бирде.
- Ленар Әтнә районыннан. Мин үзем Казаннан, - диде Гөлнара соңрак "Шәһри Казан" журналистына. - Без алты ел очрашабыз. Ленарның мондый сюрприз әзерләве турында белмәдем дә. Дөрес, ул мине үзенчә бераз әзерләгән инде. "Кеше алдында кулыңны сорасам, оялмассыңмы?" - дип әйткән иде. Әмма болай ук булыр идем уйламадым да. Ул бүген көне буе үзен башкачарак тотты. Минем белән бик сөйләшмәде, уйланып йөрде. Менә шуның өчен борчылган инде ул.
Яшьләр Ришат Төхвәтуллинны үзләренең туйларына кунак буларак та чакырырга уйлыйлар икән.
***
Әлеге концерт турында минем берниндә дә тәнкыйть эзләмичә, нәкъ менә күңелем кушканча, ничек бар - шулай язасым килде. Сезон дәвамында Казанның төрле тамаша залларында бик күп җырчыларның концертларын карыйм, әмма берсендә дә Ришаттагы кебек рәхәтләнеп ял иткәнем юк. Шуңа күрә бар дөньяларны, мәшәкатьләрне оныттырып, тормыш ыгы-зыгысыннан ял иттергәнең, кабатланмас моңың, талантың, тырышлыгың, тәрбиялелегең өчен рәхмәт сиңа, Ришат.
Нет комментариев