Кукмарада узган рейд вакытында исерткеч эчемлек куллану билгеләре булган шофер ачыкланган

6 сентябрьдә «Кукмара-Нократ Аланы» автоюлының 1нче чакрымында Кукмара районының Дәүләт автоинспекторлары, участок инспекторлары белән берлектә, «Тоннель» операциясен уздырды. Бу хакта районның Дәүләт автоинспекциясендә хәбәр иттеләр.

Рейд вакытында юл йөрү кагыйдәләрен бозуның 20 очрагы теркәлгән. Алар арасында түбәндәгеләр бар: иминлек каешын куймау (10 очрак), җәяүлеләрнең юл йөрү кагыйдәләрен үтәмәве (6 очрак), автомобильнең дәүләт номерларын укып булмау (2 очрак), транспорт йөртү таныклыгы булмаган килеш руль артына утыру (1 очрак). Моннан тыш, исерткеч эчемлек куллану билгеләре булган бер шофер ачыкланган. Аның транспорты штрафлар тукталышына куелган. 

Районның Дәүләт автоинспекциясе мондый төр тикшерүләрнең алга таба да булачагын искәртә.

фото: Эльвира Иванова/ «Кукмор-информ»