Кукмара районында мотоциклчы юл һәлакәтенә очраган

17 октябрь көнне 26 яшьлек ир-егет Югары Шөн авылы янындагы басуда “Иж Юпитер-5” прицеплы мотоциклы белән юл һәлакәтенә очрый, дип хәбәр итә Кукмара районы ЮХИДИ бүлеге.

    Тикшерү барышында ир-атның юл йөрү кагыйдәләрен бозып хәрәкәт итүе ачыклана. Аның “А” категорияле транспорт чаралары белән идарә итү хокукы, мотошлемы булмаган. Ул тәүлекнең караңгы вакытында хәрәкәт иминлеген тәэмин итә торган тизлекне сайламау һәм һава торышы шартларын исәпкә алмау нәтиҗәсендә идарәне югалтып әйләнә.

    Машина йөртүченең баш мие җәрәхәтләнеп, дәваханәгә озатыла.

    Фото: Кукмара районы ЮХИДИ бүлеге