Рәдиф хәзрәт Тимергалиев Кукмара халкын бәйрәм белән котлады

Кукмара районы имам-мөхтәсибе Рәдиф хәзрәт Тимергалиев Кукмара халкын бәйрәм белән котлады.

«Хөрмәтле райондашлар, газиз мөселман кардәшләр! Кукмара мөхтәсибәте исеменнән барчагызны да олуг бәйрәмебез — Корбан гаете белән тәбрик итәм!

Ел саен бөтен дөнья мөселманнары ошбу бәйрәмне көтеп алып, аны шатлык һәм якты өмет хисләре белән каршылый. Корбан бәйрәме барлык мөэмин-мөселманнарны берләштерә, дуслык-кардәшлекне ныгытып, калебләребезне йомшарта, шәфкать-миһербанлылык хисе тагын да артуга сәбәп була. Шушы бәйрәм көннәрендә мөселманнар Аллаһ ризалыгы өчен дип корбан чалып, кардәш-ыруларны, кунакларны корбан ите белән сыйлый, мул нигъмәтле табыннар алдында җыелып, Коръән укый, вәгазьләнә, Аллаһы Тәгаләне олуглап, Аңа буйсынып, итагать итеп яшәүнең мәгънәсен тагын бер кат искә төшерә.

„Корбан“ сүзе гарәп теленнән „якынаю, якын булу“ дип тәрҗемә ителә. Биредә адәм баласының Аллаһы Тәгаләгә якынаюы турында сүз бара. Яратучыбыз ризалыгы өчен корбан чалып, туганнарыбызны, күрше-күләнне, бигрәк тә ярдәмгә мохтаҗ булганнарны котлап, корбан итеннән авыз иттереп, мөселманнар Аллаһ ризалыгын алырга тырыша, шуның белән Аңа якынаерга омтыла. Бәйрәм көннәрендә без тагын бер кат Аллаһның бөеклегенә, динебезнең хаклыгына төшенәбез.

Корбан, ягъни Аллаһка якынаю бәйрәме мөбарәк булсын, Раббыбыз Аллаһы Тәгалә чалган корбаннарыбызны, биргән сәдакаларыбызны, барча изге гамәл-гыйбадәтебезне кабул итсен, ил-көн тынычлыгы, гаилә бәхете, балалар шатлыгы, сәламәтлек һәм күңел киңлеге нигъмәтләреннән аермасын, бу дөнья һәм ахирәт бәхетенә ирешүебезне насыйп кылсын!» — диелә котлауда.

фото: архив/ kukmor-rt.ru