Хатын-кыз: команда бирергә ярата, сүз һәм күз белән ата

Фәнис ХӘБИБУЛЛИН, 23 яшь, балигъ булмаганнар эшләре буенча инспектор, Янсыбы:

- Тел-теш тидермәслек матур итеп киенгән хатын-кыз турында ни диләр?

- “Кәнфит”.

- Малайларга нидән башка кызлар белән шаярырга ярамый?

- Баш мисез.

- Хатын-кыз сумкасында нинди әйбер булу бик кирәк?

- Көзге.

- Нәрсә куркынычрак: сынган тырнакмы, яисә көйгән пирогмы?

- Сынган тырнак.

- Заманча хатын-кыз нинди булырга тиеш?

- Бүгенге көндә кызлар егетләрдән калышмый: укымышлы, мөстәкыйль, шул исәптән финанс ягыннан да. Бер үк вакытта нәфис, хатын-кызга хас табигатьле булып калсыннар иде.

Айдар БОРҺАНОВ, 44 яшь, каратэ буенча спорт мастерлыгына кандидат, Зур Кукмара:

- Чиксез сабыр һәм рәхимле хатын турында әйтәләр...

- Ярата торган хатын, дип.

- Хатын-кыз юктан нәрсә әзерли ала?

- Салат.

- Хатын-кыз нәрсә белән “атарга” мөмкин?

- Сүзләр белән, күзләре белән дә.

- Спа-салон – гаилә бюджетын бөлдерүме яки...

- Матурлык процедурасы.

- Хатын-кызның түземлелеге – талантмы яки...

- Еллар дәвамында “чарланып” килгән сыйфат.

Марат ХӘСӘНОВ, 45 яшь, музыка мәктәбе укытучысы, республикабызның атказанган мәдәният хезмәткәре, Кукмара:

- Хатын-кызның әсир итә торган көчле коралы ни ул?

- Елмаю.

- Тәмле ризык әзерләү өчен кухняга юнәлгәндә хатын-кыз үзе белән ни алырга тиеш?

- Тоз.

- Хатын-кызлар нинди ирләр эше белән шөгыльләнергә “ярата”?

- Команда бирергә.

- Ул килә дә китә, кайчак кинәт кенә килә. Нәрсә ул?

-  Йокы.

- Чибәр хатынны һәм шундый ук ирне ни бәйли?

- Матур балалар.

Алмаз НИГЪМӘТҖАНОВ, блогер, 12 яшь, Вахит авылы:

- Бәхетле булу өчен кызга ни кирәк?

- Әлбәттә, игътибар.

- Кызлар нинди косметика чараларын кулланырга ярата?

- Иннек һәм күз кабаклары өчен буяу.

- Тел хатын-кызның дустымы яки дошманымы?

- Иллегә илле. Аралашучан кыз – зур плюс, әмма күп такылдауга әйләнә икән – бу инде минус.

- Гүзәл затлар турында күпме китап язылган?

- Бик күп.

- Сез соклана торган, бөтен дөньяга танылган хатын-кыз.

- Беренче чиратта, әниемә сокланам.Шәхсән мин үзем спорт белән мавыгам, шуңа күрә спортчыларның берсен атыйсым килә. Бу – Екатерина Гамова. Минем карашка, ул - максатчан һәм хатын-кызга хас табигатьле кеше.

фото: pixabay.com, гаилә архивыннан