Язлар җитте (шигырь)

Язлар җиткән, күңел инде сизә

Салкын карлы кышлар үткәне.

Яз бәйрәме - нәүрүз хәбәр итә

Яңа еллар килеп җиткәнен.

Җем-җем килә ап-ак карлар,

Әйтерсең лә чәчәк бәйләме.

Борынгыдан килгән язгы бәйрәм,

Котлы булсын нәүрүз бәйрәме.

Күктә кояш көлә, тамчы тама,

Һәр матурлык күзгә ташлана.

Табигатьнең бөек яңаруы

Нәүрүз бәйрәменнән башлана.

Нәүрүз бит ул-яңа көн дигән сүз,

Тыныч булып таңнар атсыннар.

Нәүрүз бәйрәмнәрен бар халыклар

Сөенешеп каршы алсыннар.

Яз килүен нәүрүз хәбәр итә,

Җыр сузалар күктә тургайлар.

Машиналар тавышы күмәр басуларны,

Яшелләнер болын-тугайлар.

Кәүсәрия Галимуллина

фото: moi-portal.ru