Кукмара районы башлыгы Сергей Димитриев Халыклар бердәмлеге һәм Татарстан Конституциясе көннәре уңаеннан район халкын бәйрәм белән котлады

4 ноябрь - Халыклар Бердәмлеге көне

6 ноябрь - Татарстан Конституциясе көне

-Ноябрь аенда билгеләп үтелүче истәлекле көннәр тормышыбызның нигезен тәшкил итүче, җәмгыятебезнең яшәү рәвешен чагылдыручы сәяси, социаль һәм әхлакый сыйфатларның әһәмиятен тагын бер кат ассызыклый, - диелә котлауда. - Халыкның чын бердәмлеге һәрвакыт җәмгыятьтәге теләктәшлеккә нигезләнгән булуын аңлау мөһим. Тормыш сыйфатын яхшырту, авыр чакта бер-береңә кул сузу, төрле дин, милләт халкына, аларның гореф-гадәтләренә хөрмәт белән карау, шәхес хокукларын һәм иреген саклау, гражданлык институтларын үстерү - республикабызны үстерү, татарстанлыларның бердәмлеген ныгыту юнәлешләрен без шунда күрәбез. Күп милләтле районыбыз халкы да моңа үзенең тырыш хезмәте, матур традицияләре белән зур өлеш кертә. Киләчәктә дә башкарган эшләребез уң, җәмгыятебез өчен файдалы булсын. Һәрберебезгә нык сәламәтлек, күңел тынычлыгы, яңа шатлык-куанычлар телим.