Кукмара районында песи өч кешене тешләгән һәм анда котыру авыруы булуы ачыкланган

Авыл җирлекләрендә барлык төр хайваннарга котыру авыруына каршы прививка ясау башкарылса да, әлеге чирнең яңа учаклары кабынып тора. Ноябрь аенда Зур Сәрдек авылында песи өч кешене тешли һәм анда котыру авыруы булуы ачыкланды, - дип хәбәр итте район ветеринария берләшмәсе җитәкчесе Рифат Кәримуллин. - Мондый күңелсез хәлләр кабатланмасын өчен эт-мәче асраучылар прививка ясатып, үзләрен һәм дүрт аяклы дусларын кайгыртсыннар иде. Прививка ясату өчен район ветеринария берләшмәсенә яки участок ветеринария табибларына мөрәҗәгать итәргә кирәк. Әлеге хезмәт бушлай башкарыла һәм хайваннар өчен куркыныч тудырмый.