Хезмәт даны
  • Рус Тат
  • Кукмарада "Ришвәт бирмим һәм ришвәт алмыйм" дигән акция узды (+фото)

    Кукмара бистәсе үзәгендә коррупциягә кагылышлы буклетлар һәм 5 мең сумлык "акчалар" өләштеләр. "Ришвәт бирмим", "Ришвәт алмыйм" дигән язулы акчаларның икенче ягында коррупциягә кагылышлы законнан өземтәләр дә китерелгән иде. "Бердәм Россия" партиясенең җирле бүлеге, "Волонтер-Кукмара" берләшмәсе һәм "Форпост" яшьләр хокук саклау хәрәкәте вәкилләре оештырган мондый төрдәге акцияләр бездә беренче тапкыр гына...

    Кукмара бистәсе үзәгендә коррупциягә кагылышлы буклетлар һәм 5 мең сумлык "акчалар" өләштеләр. "Ришвәт бирмим", "Ришвәт алмыйм" дигән язулы акчаларның икенче ягында коррупциягә кагылышлы законнан өземтәләр дә китерелгән иде.

    "Бердәм Россия" партиясенең җирле бүлеге, "Волонтер-Кукмара" берләшмәсе һәм "Форпост" яшьләр хокук саклау хәрәкәте вәкилләре оештырган мондый төрдәге акцияләр бездә беренче тапкыр гына уздырылмый. Әмма халкыбыз аларга әле дә күнегеп җитә алмый икән. Әйтик, үтеп баручыларның күбесе коррупция турында үз фикерләрен әйтергә, аңа каршы көрәш юлларын тәкъдим итәргә кыенсына. Буклетларны, "акчалар"ны да үз кулларына тоткач, башкалар күргәнче дипме, тизрәк кесәләренә салып куючылар бар.

    -Ришвәт юлына, гадәттә, мәсьәләне җиңел һәм тиз арада хәл итәргә теләүчеләр бара. Бу проблема илебез буйлап күзәтелгәндә, Кукмарада да ришвәт бирү омтылышлары юктыр дип әйтеп булмый, - ди "Волонтер-Кукмара" берләшмәсе кураторы Фирүзә Шәмиева. - Бу акциянең асылы да шунда: коррупциягә каршы көрәшне иң элек гади халыктан, үзебездән башлыйсы. Соңгы вакытта без бурычлар һәм хокуклар төшенчәләрен бутый башладык. Ягъни нәрсәдер тиеш булса да, булмаса да - мәсьәләне үз файдабызга хәл итәргә тырышабыз. Әгәр балалар коррупциягә каршы булуларын белдереп бирегә чыкканнар икән, димәк, уйланырга җирлек бар. Йомырка тавыкны өйрәтми дисәләр дә, бу очракта алар өлкәннәргә үрнәк булып тора.

    Район башлыгы ярдәмчесе Гөлшат Нурмөхәммәтова да мондый чараларның уздырылуы халык өчен бер тәрбия чарасы булуын искәртте:

    -Бүгеннән районыбызның барлык белем бирү учреждениеләрендә коррупциягә каршы көрәш темасына атналык игълан ителде. Аның кысаларында махсус сыйныф сәгатьләре, рәсемнәр һәм иншаларга бәйгеләр, прокуратура вәкилләре белән очрашулар оештырылачак. Шул рәвешле без яшьләрнең коррупциягә карата битараф калмавын, бу проблеманы хәл итү буенча үз фикерләрен ишетә алачакбыз, - дип сөйләде ул.

    Коррупциягә мөнәсәбәтләре турында үтеп баручылар тагын нинди фикерләр җиткерде?

    Людмила АЛЕКСЕЕВА:

    -Коррупциягә карашым тискәре, шуңа яшь буынның, партия вәкилләренең аңа каршы көрәшкә чыгулары күңелемә рәхәтлек бирде. Ришвәтчелек белән без нәкъ шулай, күмәкләшеп көрәшергә тиеш бит!

    Алмаз ФАТЫХОВ:

    -Бу акциядә балалар да катнашуы зур мәгънәгә ия. Балалар - безнең киләчәгебез, алар арасында булачак дәүләт хезмәткәрләре, оешма җитәкчеләре үсеп килә. Ә әлеге акцияләр ярдәмендә балалар яшь вакыттан ришвәтчелеккә тискәре мөнәсәбәтне күреп, шуны аңнарына кертеп үсәләр.

    Әлфия апа:

    -Илдә ришвәтчелек бетсә нишләрбез икән без? Мөгаен, һәркемгә намус дигән кешелек сыйфаты әйләнеп кайтыр иде. Аннары җир йөзендә, халык арасында гаделлек, рәхимлек, шәфкатьлелек урнашыр иде. Әйдәгез, ришвәтчелек турында 9 декабрь - Халыкара коррупция көнендә генә түгел, бер-беребезгә даими искәртеп торыйк. Бәлки, нәтиҗәсе дә булыр...

    Нравится
    Поделиться:
    Реклама
    Комментарии (0)
    Реклама
    • Кукмарада әти-әниләр бердәм республика имтиханы тапшырдылар
    • Кукмарада прокуратура һәм гадәттән тыш хәлләр оешмалары тикшерүгә чыкты
    • Кукмарада балалар командалары арасында хоккей буенча төбәкара ярышларның ачылу тантанасы
    • “Үрәсбаш” ярдәмче хуҗалыгында семинар булды
    • Кукмара районында үткән халык җыеннарында Римма Ратникова катнашты
    • Кукмара хоккееның 50 еллыгы уңаеннан шайбалы хоккей буенча турнир
    • Сез эшне ничек эзлисез?
      22 кеше тавыш бирде
    Ночной режим