Кукмара мәктәбендә «Шахмат Королевасы» клубы ачылды

«Шахмат зоналары» проектын тормышка ашыру кысаларында Татарстан Республикасы шахмат федерациясе ярдәме белән Кукмараның 3нче мәктәбендә «Шахмат Королевасы» клубы ачылды.

Аның инициаторлары - әлеге белем бирү учреждениесе җитәкчелеге һәм шахмат буенча тренер Владислав Абдулов.

Ачылу тантанасында шахмат федерациясе вәкиле, шахмат буенча халыкара мастер Илдар Низамов катнашты. Титуллы шахматчы укучылар өчен мастер-класс үткәрде.

«“Шахмат Королевасы” клубы ачылышында 30га якын укучы катнашты, шуларның 10сы - башлангыч мәктәп укучылары. Клубта теләге булган һәркем шөгыльләнә ала. Шулай ук шахмат федерациясе мәктәпкә 10 комплект шахмат җиһазлары бүләк итте», - дип сөйләде 3нче урта мәктәп директоры Диләрә Ганиева.

Бу көнне шахмат буенча югары категорияле тренер Владислав Абдулов шахмат клубының беренче турнирын үткәрде.