Мәмәшир авыл җирлегендә дәүләт ярдәме ял зонасы ясауга юнәлдерелә

Мәмәшир авыл җирлегенә быел республикадан өч грант бирелгән. Дәүләт ярдәме һәйкәлнең тирә-юнен төзекләндерү, ял зонасы булдыру, хоккей мәйданчыгы ясау өчен файдаланылачак. Һәйкәл мәчет янында урнашкан, ял зонасы да шунда булачак. Бу хакта Мәмәшир җирлек башлыгы Илгиз Әхмәтҗанов сөйләде.

«Һәйкәлне үзара салым акчалары хисабына төзекләндерә башлаган идек, грантка исә территорияне коймалап алдык, яктырткычлар, капка куйдык, 550 квадрат метр мәйданда җәяүлеләр юлына брусчатка түшәдек. Спорт тренажерлары да кайтты инде, тиздән аларны урнаштырып бетерәбез. Шулай ук биредә балалар мәйданчыгы да була. Эскәмияләр кую, чәчәкләр утырту өчен дә махсус урыннар ясыйбыз», - ди җирлек башлыгы.

Грантның икенчесе яңа клуб янында балалар һәм спорт мәйданчыклары булдыруга тотылачак. Анда тренажерлар, МАФлар (кече архитектура формалары) кую планлаштырыла. Өстәмә бирелгән өченче дәүләт ярдәменә хоккей мәйданчыгы ясарга ниятлиләр.