Кукмараның полиция хезмәткәрләре «Калина» урлауда шикләнелүчеләрне тоткарлаган

Кукмараның хокук саклау органнары «Лада Калина» автомобилен урлауда шикләнелүче ике кешене тоткарлаган. Бу хакта Россия Эчке эшләр министрлыгының Кукмара районы буенча ЮХИДИ бүлеге башлыгы вазыйфаларын вакытлыча башкаручы полиция капитаны Сергей Егоров хәбәр итте.

«Оператив-эзләү чаралары барышында урлауда шикләнелүчеләр ачыкланды: 2005 елгы ике яшь кеше булып чыкты. Аларның берсе — Кукмарада яшәүче, икенчесе — Нократ Аланы районының Пенәгәр авылыннан», — диде Сергей Егоров. 

Шикләнелүчеләр кылганнарын таныганнар.

Исегезгә төшерәбез, шушы көннәрдә Кукмараданың Маяковский урамындагы 18нче йорт янында «Лада Калина» автомобилен урлап киткәннәр иде. Икенче көнне автомобиль Маяковский урамындагы 19нче йорт янындагы сарайлар арасында табылган.