Кукмарага дзюдо буенча Дөнья һәм Европа чемпионы Таһир Хәйбуллаев килде

Бүген Кукмарага Россия дзюдочысы, Олимпиа, Дөнья, Европа чемпионы, Россиянең атказанган спорт мастеры Таһир Камалетдин улы Хәйбуллаев килде.

Зур кунак «Барс-Арена» спорткомплексында шөгыльләнүче дзюдочылар белән очрашты, яшь спортчыларның сорауларына җавап бирде, балаларга үзе алып килгән бүләкләрне таратты.

«Спорт белән шөгыльләнү өчен сездә кулай шартлар тудырылган. Әлеге бина да бик җылы, уңайлы. Мондый мөмкинлекләр кайбер зур шәһәрләрдә дә юк. Рәхәтләнеп, бар көчеңне кызганмыйча шөгыльләнәсе дә шөгыльләнәсе һәм иң элек Кукмарада, аннары Татарстан һәм Россия күләмендә нәтиҗәләргә ирешәсе. Спорт ул көндәшеңне, тренерыңны хөрмәт итәргә өйрәтә, холыкны ныгыта, максатчанлык, тырышлык булдыра. Дзюдоны Кукмарада үстергән өчен район башлыгы Сергей Димитриевка зур рәхмәт. Дзюдо, самбо — спортны яратучылар өчен менә дигән башлангыч», — диде Таһир Хәйбуллаев.

2023 елның сентябреннән «Барс Арена» спорткомплексында дзюдо буенча түгәрәк эшли. Тренерлары — Алмаз Йосыпов. Бүгенге көндә анда ике төркемдә — мәктәп яшендә һәм балалар бакчасына йөрүче 40 бала шөгыльләнә.

Фото: Алсу Сәләхетдинова/ «Хезмәт даны»