Татарстанда коронавирус белән зарарлануның 90 яңа очрагы ачыкланган

Татарстанда соңгы тәүлектә Covid-19 белән зарарлануның 90 яңа очрагы ачыкланган. Бу хакта «Татар-информ» мәгълүмат агентлыгына коронавирус буенча оператив штаб хәбәр итә.

Инфекция йоктырган 28 кеше хастаханәгә урнаштырылган, 62 кеше өйдә дәвалана. Алты очрак – читтән кертелгән, 84е элемтә юлы белән инфекция йоктыручылар.

Чир йоктыручыларның күбесе Казанда – 38 кеше. Яр Чаллы шәһәрендә - 10, Әтнә, Яшел Үзән районнарында - алтышар, Түбән Кама районында – 4, Буа, Чүпрәле, Алабуга районнарында – өчәр, Әлмәт, Балтач, Лениногорск, Питрәч районнарында – икешәр, Апас, Арча, Югары Ослан, Биектау, Камско-Устье, Лаеш, Мөслим, Сарман, Теләче районнарында берәр кеше коронавирус белән авырый.

Татарстанда бүгенге көнгә кадәр барлыгы Covid-19ның 2787 очрагы расланган, 1907 кеше савыккан. Үлем очраклары – 10.

фото: «Татар-информ»