Кукмарадан махсус хәрби операция зонасына 26 кубометр пиломатериал җибәрелде

Олы йөрәкле, игелекле райондашыбыз Фәнил Хөрәмшин махсус хәрби операция зонасындагы егетләргә пиломатериал һәм башка төзелеш кирәк-яраклары җибәрде.

«Мөмкинлек булганда, киләчәктә дә илебез тынычлыгы өчен көрәшүче хәрбиләргә ярдәм итәчәкбез. Бу юлы йөк машинасына 26 кубометр төзелеш материалы, башлыча такталар, 100 данә ОСБ плитәсе төядек. Берничә көннән тагын кайтабыз, диделәр. Ул вакытта да исемлек буенча сораган әйберләрен әзерлисе булыр», — ди Фәнил Наил улы. 

Өлешчә мобилизацияләү башлангач, махсус хәрби операция зонасына киткән «Старый» позывнойлы Тукай районы егетенең Кукмарага инде беренче тапкыр гына кайтуы түгел. «Төзелеш материаллары белән булышканы өчен Фәнил абыйга рәхмәт. Җиңү безнең якта булачак», — ди ул. 

Йөк автомобиле шоферы — тумышы белән Чита шәһәреннән. Хәрби өлкәдә инде 11 ел икән.

«Мин матди-техник тәэмин итү ротасында шофер вазыйфасын башкарам. Күп вакыт гел юлда уза, төрле җирләрдән гуманитар йөк алып кайтам. Пиломатериллар окоп, блиндажлар ясау, оборона сызыгын ныгыту өчен кирәк. Кукмараны беренче тапкыр күрүем. Бирегә якынча өч тәүлеккә якын юл үтеп килдек. Исән-имин кире кайтып җитәргә язсын», — ди ул.

фото: Алсу Сәләхетдинова/ «Кукмор-информ»