Кукмарада киңәйтелгән киңәшмә узды

Бүген район Мәдәният йортында үткәрелгән киңәйтелгән киңәшмә алдыннан күркәм гамәл кылынды: оешма-предприятие җитәкчеләре мөмкинлекләре чикләнгән балалар өчен традицион «Теләкләр чыршысы» Бөтенроссия акциясендә катнашты. Димәк тиздән балалар Кыш бабай бүләкләрен кулларына алачак. 

Киңәшмә башкарма комитет җитәкчесенең беренче урынбасары Чулпан Хәнәфинаның районның социаль-икътисади хәле белән таныштырудан башланды. Ул үтеп баручы елның 9 аена анализ ясады һәм киләсе елда нинди программаларда катнашу мөмкинлеге турында сөйләде.

Бәйрәм алды һәм бәйрәм көннәрендә безне нинди чаралар көтүе, яңа 2025 елда районыбызның социаль өлкәсендә ниләр планлаштырылуы турында район башкарма комитет җитәкчесенең социаль мәсьәләләр буенча урынбасары Айгөл Әхмәтшинаның чыгышы тыңланды. 

Сәрдекбаш авыл җирлегендәге эшләрнең барышы белән авыл җирлеге башлыгы Илгиз Нәбиев сөйләп узды. Ул шулай ук киләчәктә җирлектә нинди эшләр планлаштырылганы турында уртаклашты һәм бу уңайдан кайбер социаль объектларны программалар кысаларында эшләп булмасмы икән дип үз фикерен белдерде.

Район ветеринария берләшмәсе җитәкчесе Рифат Кәримуллин исә терлекләрдә була торган куркыныч авыру — бруцеллёзны районыбызга кертмәү өчен нинди чаралар күрергә кирәклегенә басым ясады. Җирлекләрдә һәм авыл хуҗалыгы предприятиеләрендә чит төбәкләрдән кайта торган малларга аеруча сак караш кирәклегенә тагын бер кат җитәкчеләрнең игътибарын юнәтте. 

Район Башлыгы Сергей Димитриев киңәшмәне йомгаклап, Яңа ел алдыннан барлык предприятиеләр һәм учреждениеләрне үз территорияләрен бизәүдә актив катнашырга, шулай һәрбер мөмкинлекләрне файдаланып спортка мөмкин кадәр күбрәк хезмәткәрләрне тартырга чакырды. Ул шулай ук: «Безнең уртак бурычыбыз — районыбыз халкы өчен куркынычсыз шартлар тудыру, шуңа күрә куркынычсызлык мәсьәләләренә җаваплы карарга кирәк», – дип тагын бер кат басым ясады. 

Киңәшмәдә шулай ук бер төркем райондашлар: җитәкчеләр, белгечләр, тренерлар, спортчылар казанышлары өчен бүләкләнде.

фото: Эльвира Иванова/ «Кукмор-информ»