Кукмара 4нче урта мәктәбендә хәрбиләргә ярдәм йөзеннән татлы ярминкә оештырылды

Кукмара 4нче урта мәктәбендә бик матур итеп «Татлы ярминкә» оештырылды. Ярминкә «Ватанны саклаучылар елы» һәм Бөек Җиңүгә 80 ел тулуга багышланган иде. 

— Безнең белем йортында хәрби-патриотик тәрбиягә зур игътибар бирелә: төрле кичә, очрашулар уза, махсус хәрби операция зонасындагы егетләргә гуманитар ярдәм туплап җибәрелә, макулатура җыюдан кергән һәм ярминкәләрдә тупланган акчалар шулай ук хәрбиләргә кирәк-яраклар алу өчен тапшырыла, — диде мәктәп директоры Регина Минемуллина. — Махсус хәрби операция зонасында гомере өзелгән чыгарылыш сыйныф укучылары турында да онытмыйбыз, алар истәлегенә мемориаль такталар куела. 9 декабрь — Ватан Геройлары көнендә тагын ике егеткә истәлек тактасы ачарга планлаштырабыз. 

Башлангыч сыйныфлар укытучысы Светлана Шакирова да мондый төр чараларның балалар өчен ватанпәрвәрлек тәрбияләүдә әһәмияте зур булуын билгеләп үтте. 

— Бу уку елында ярминкәне кечкенә сыйныфлар башлап җибәрсә, икенче чиректә — уртанчы, алга таба ул өлкән звено укучылары катнашында оештырылачак. Ярминкәгә һәр сыйныф тырышып әзерләнде. Балалар нинди генә тәм-том, камыр ризыклары алып килмәгәннәр! Күргәнегезчә, өстәлләр сый-нигъмәтләрдән сыгылып тора! Әниләрнең күбесе сатучы ролен башкарды, аларга балалар да булышты. Хәрбиләргә азмы-күпме ярдәм итә алуыбыз — безнең өчен горурлык, — диде Светлана Алексеевна. 

«Татлы ярминкә» көнне Нократ Аланының Россия Герое, генерал-лейтенант Валерий Асапов исемендәге махсус әзерлек үзәгендә шөгыльләнүче егет-кызлар хәрби кораллар күргәзмәсен тәкъдим итте.

Фото: Алсу Сәләхетдинова/ «Кукмор-информ»