Зират чистарту - изге гамәл

"Исәннең кадерен бел, үлгәннең каберен бел", - дигән халкыбыз мәкален ислам дине дә кире какмый. Ел саен апрель ахыры - май башында оештырыла торган зират чистартуга авылдашлар гына түгел, якташлар кайтуы да гадәти хәлгә әйләнде. Кукмара районы имам-мөхтәсибе Зиннур хәзрәт Сәмигуллин бу турыда: "Пәйгамбәребез Мөхәммәд (с.г.в.с.) "Пакъ булмаганнар җәннәткә кермәс", - дигән. Кеше зиратка баргач, әти-әнисенә, туганнарына да дога кылмыйча калмый. Зират чистарту - ул әле изге һәм игелекле гамәл дә", - дип бәя бирде. Бүген районыбызда 70 мәхәллә исәпләнә, һәр мәхәлләдә бер-ике зират бар.