Алексей Морозовка «Ак Барс» генераль менеджеры вазифасын тәкъдим иттеләр

«Ак Барс» хоккей клубының тренерлык штабы үзгәреш кичерде. Бу хакта Казан клубының матбугат хезмәте хәбәр итә. Элегрәк хәбәр ителгәнчә, өлкән тренер Валерий Белов Мәскәү өлкәсенең "Витязь" командасы җитәкчелегенә чакыруны кабул иткән. Тренер Андрей Соколов, башка эшкә күчү сәбәпле, Казан клубыннан китте.

Якын арада "Ак Барс" хоккей клубы җитәкчелеге команданың тренерлар штабын вакантлы вазифаларга дәгъва итүчеләр исәбеннән тәгаенләячәк.

Шулай ук бүген "Ак Барс" хоккей клубы җитәкчелеге тарафыннан Алексей Морозовка Казан клубының генераль менеджеры вазифасын биләргә рәсми тәкъдим ясалды. Элек Морозов Казан клубының капитаны иде, хәзер Яшьләр хоккей лигасының идарә итүче директоры вазифасын били.

Татар-информ