Кукмарада "Үлемсез полк" тантанасы район Башкарма комитеты бинасы яныннан башлана

9 Май көнне Бөек Җиңүнең 72 еллыгына багышланган бәйрәм тантанасында быел да Кукмарада "Үлемсез полк" акциясе уздырылачак. Әлеге акциягә район халкын актив кушылырга чакырабыз. Сугыш елларында илебез азатлыгы өчен соңгы тамчы канына кадәр көрәшкән әтиегез, бабагыз, туганнарыгызның фотосурәтен тотып сез дә чарада катнаша аласыз.

"Үлемсез полк" акциясенең тантаналы йөреше район Башкарма комитеты бинасы яныннан сәгать 9.50дә башлана һәм Җиңү Паркында тәмамлана.

Ил азатлыгы өчен шаһит киткән каһарманнарыбыз бәйрәм көнендә шул рәвешле "сафка басар". Һәр портрет - үзе бер тарих, истәлек. Батырларның даны мәңгелек, күпме сулар акса да, алар турында хатирәләр халык күңеленнән җуелмыйча, буыннан буынга тапшырылып килер.