Ник алданрак хәбәр итмиләр?

Мәктәпләрдә укулар башланырга да өлгермәде, балаларга ГТО нормаларын тапшыру өчен дәваханәдән белешмә кирәк булуын әйттеләр. Һәм барлык әти-әниләр, эш урыннарыннан сорап, дәваханәгә ашыкты. Минем үземә дә берничә тапкыр дәваханә юлын таптарга туры килде. Табиб янына да тиз генә кереп чыгарлык түгел, су буе чират көтәргә туры килә бит әле. Нишләп белешмәләр кирәклеге турында алданрак, җәй айларында ук кисәтеп куймыйлар икән? Югыйсә, телефоннар һәркемдә бар, анда сыйныф белән төркемнәр оештырылган, аралашып торабыз. Дәваханәдә дә ул хәтле чират булмас иде, вакыт булган саен әкренләп белешмәне әзерләр идек.