Компьютер серләренә өйрәндек

Районның пенсия фонды яңа ел алдыннан өлкәннәргә зур бүләк ясады: компьютерда эшләргә өйрәтү буенча укулар оештырды. Дәресләр гимназиядә булып, сабыр, тыныч холыклы остазыбыз Гөлназ Шакирова безне компьютер серләренә өйрәтте. Аның ярдәме белән "файл-маеллар"га кереп чумдык. Арабызда сигезенче дистәне ваклый башлаганнар да бар иде, әмма зур үҗәтлек белән курсларны тәмамлап чыктык. Хәзер без "Госуслуги"га кереп, күп сорауларга җавап таба һәм өйдән чыкмыйча гына күп эшләребезне башкара алачакбыз. Безгә уку мөмкинлеге булдырганнарның һәркайсына рәхмәтләребез зур.