Якташыбыз Фарил Галиәхмәтов Биектау районында "Шәһәр яны урман хуҗалыгы" директоры булып эшли

Якташыбыз, Тырыш авылында туып, саф урман һавасы сулап үскән, 20 елдан артык гомерен урманчылыкка багышлаган, Биектау районы территориясенә урнашкан "Шәһәр яны урман хуҗалыгы" директоры Фарил Галиәхмәтов белән элемтәгә чыгып, табигать-Анабызга хезмәт итүнең серләре белән уртаклаштык.
-Фарил Фоатович, хәлләрегез ничек? Урманчы хезмәтенә ничек килдегез, яшеллеккә күмелеп утыручы Тырыш авылында туып-үсүегезнең дә йогынтысы булмый калмагандыр?
-Исәнмесез, Аллага шөкер. Әлбәттә, һөнәр сайлаганда туган төбәгемнең тәэсире зур булды. Җәй көннәрендә иртә таңнан әти безне урманга печән чабарга алып кереп китә иде. Күп вакытыбызны агачлар шаулавын, кошлар сайравын тыңлап, урман биргән нигъмәтләрдән сыйланып үстек. Шуңа күрә мәктәпне тәмамлаганнан соң укуымны Йошкар-Оланың техник университетында дәвам итеп, урман хуҗалыгы инженеры белгечлеге алып чыктым. Шулай да Нократ Аланында заводка эшкә урнашып бәхетемне сынап карадым, әмма бер ел да эшли алмадым, күңелем ятмады. Ә урманчылыкта башланган хезмәт юлыма тугры калдым, ничә еллар үтсә дә, шул өлкәдә эшләвемне дәвам итәм. Башта хезмәтемне мастер буларак башлап җибәргән идем, аннары урманчы, хәзер исә директор вазыйфаларын башкарам.
-Урманчы булыр өчен нинди сыйфатлар кирәк? Яшьләр кызыксынамы әлеге өлкә белән?
-Бездә эшләгән бер өлкән яшьтәге абзый әйтә иде: "Урман хуҗалыгында эшләмиләр, ә урманга хезмәт итәләр", - дип. Бу чыннан да шулай, урманчы һөнәрен матди файда эзләгән кеше үз итә алмый, чөнки хәзер акча эшләүнең күп төрле ысуллары бар. Ә урманчылыкка эшкә табигатьне яраткан, авыр эштән курыкмаганнар гына килә. Чөнки техника гына түгел, кул хезмәте еш кулланыла, кайбер очракта атналар да ялларсыз бер-берсенә бәйләнеп китә. Халык белән эшләве бик авыр: шәһәр яны булгач, тиешсез урынга йорт салулар, рөхсәтсез агач кисүләр, чисталыкны, тәртипне бозулар әледән-әле кабатланып тора.
-Урманннарны саклап калу өстендә нинди эшләр башкарыла?
-2010 елдагы корылыктан соң тернәкләнеп китүе авыр булды. Урман полосалары корыган агачлардан чистартылды, алар урынына яңалары утыртылды. Үсентеләрне үзебезнең питомникта үстерәбез, шулай ук Сабадан да сатып алабыз. 57 гектар җирдә ачык тамыр системасы белән 3 миллион тирәсе үсенте үстерелә. Урман эченә, шулай ук тау битләренә, сазлыклы урыннарга, ерганакларга утыртабыз, сатуга чыгарабыз, шәһәр яны булгач, яшелләндерү белән дә шөгыльләнәбез.
- Гаиләгезнең саулыгы турында сорамасак тыйнаксызлык булыр иде...
-Рәхмәт, гомер сизелми генә ага. Тормыш иптәшем Гүзәлия белән ике кыз, бер малай үстерәбез. Хатыным китапханәдә эшли, олы кыз югары уку йортында укый, икесе - мәктәп укучысы. Әле шуны уйлап утырам: эш белән мавыгып, балаларның сабый чагы сизелми дә үткән икән.
-Туган якларыгызга кайтасызмы, әти-әниегез исән-иминме?
-Шөкер, әти белән әни Тырыш авылында гомер кичерәләр. Гел кайтып йөреп булмаса да, сәламәтлекләрен, хәл-әхвәлләрен белешеп торабыз. Әти-әни фикере зур мәгънәгә ия, әле хәзер дә алар сүзеннән чыккан юк, киңәшләрен тотып яшибез.
-Урман хуҗасы буларак газета укучыларга ни әйтер идегез?
-Көннәр җылына башлагач, кешеләр урманга, посадка, су буйларына килә, ял итәргә иң матур, чиста урынны эзли. Ә менә кайтып киткәндә башкалар, үзеннән соң киләчәк кешеләр турында уйламый, артыннан чәчелеп чүп-чары кала. Шуңа күңел әрни, ял итәргә теләүчеләр күп, ә безнең хезмәткәрләр санаулы гына бит, барысы артыннан да җыештырып бетереп булмый. Шуны әйтәсе килә: тирә-ягыбызга битараф булмыйк, урманнарның, гомумән, табигатьнең ямен җибәрмик.