Дин йортларын төзекләндерү кирәкле гамәл

Газетаның үткән саннарының берсендә Танькино авылындагы чиркәүдә реставрация эшләре башлануы турында язылган иде. Бик кирәкле эш: дин йортлары һәр авылның күрке бит ул. Шул уңайдан үткәндәге вакыйгалар искә төште. Узган гасырның 80нче елларында, биш тонна калай сатып алып, Чарлы чиркәвенә ремонт ясаткан идем. Шуның өчен сүктеләр дә инде мине. Янәсе, чиркәүне ремонтлау, шабашникларга акча түләгәндә үземә дә өлеш чыгару өчен кирәк булган дип, пычрак аттылар. Ике ел буе ишеттем мин бу сүзләрне. Югыйсә, чиркәү бөтенләй җимерелеп бетмәсен, халыкка хезмәт итсен дигән максат белән башкарылган эш иде ул. Менә хәзер җимерек мәчетләрне, чиркәүләрне яңадан сафка бастырырга керештеләр бит. Ә без бу изге эшне моннан 30-35 ел элек үк хәл иткәнбез.

Рәфыйк РӘҮФОВ, хезмәт ветераны, Татар Толлысы авылы