Кукмарада рейд вакытында ЮХИДИ инспекторлары юл хәрәкәте кагыйдәләрен бозуның 25 очрагын ачыклаган

30 гыйнварда 08.00 сәгатьтән 10.00 сәгатькә кадәр Кукмара шәһәренең Магистральная урамында ЮХИДИ хезмәткәрләре участок уполномоченныйлары белән берлектә «Тоннель» операциясен үткәрде. Бу хакта Кукмара районы ЮХИДИ бүлегендә хәбәр иттеләр.

Рейд барышында юл хәрәкәте кагыйдәләрен бозуның 25 очрагы ачыкланган. Алар арасында укылмый торган дәүләт номерлары булган транспорт чарасы белән идарә итү — 17, җәяүлеләрнең юл хәрәкәте кагыйдәләрен бозуы — 3, иминлек каешларын куймау — 3, баланы махсус балалар утыргычы булмаган килеш транспортта йөртү — 1, светофорда кагыйдәләрне үтәмәү — 1.

Районның дәүләт автоинспекциясе машина йөртүчеләрне мондый төр рейдларның даими алып барылачагын искәртә.

Фото: Эльвира Иванова/ «Хезмәт даны»