Кукмарада комиссия утырышы вакытында юл хәрәкәте куркынычсызлыгын тәэмин итү мәсьәләләре буенча фикер алыштылар

Кукмарада юл хәрәкәте иминлеге буенча комиссиянең чираттагы утырышы узды. Утырышны район юл хәрәкәте иминлеге комиссиясе рәисе Азат Гарифуллин алып барды.

Утырышка «Юл хәрәкәте иминлеге» дәүләт бюджет учреждениесенең Казан шәһәрендәге территориаль идарәсе башлыгы Наил Агишев, юл хәрәкәте иминлеген тәэмин итү буенча Татарстан Республикасы Хөкүмәт комиссиясе секретаре Фуад Исмаилевлар чакырылган иде.

Наил Агишев «Юл хәрәкәте иминлеге» бүлекләренең эшчәнлегендә проблемалы мәсьәләләр, район эчке эшләр бүлеге начальнигы Рамил Нургалиев балалар юл-транспорт травматизмын кисәтү буенча үткәрелгән чаралар турында сөйләде. Район мәгариф идарәсе җитәкчесе Илфат Әхмәдуллин балалар юл-транспорт травматизмын профилактикалау мәсьәләләренә тукталды. Бу, үз чиратында, җәяүле, велосипедта йөрүче балалар, скутер, мотоцикллар һәм шәхси мобильлек чаралары (электросамокатлар, гироскутерлар, сигвейлар һәм моноколеслар) белән идарә итүчеләр. Ә районның ЮХИДИ бүлеге начальнигы Фирдүс Фәхретдинов агымдагы елның алты аенда райондагы авария хәленә анализ ясады.

— 2023 елның алты аенда район территориясендә сигез юл-транспорт һәлакәте теркәлде, анда бер кеше һәлак булды, сигез кеше төрле тән җәрәхәтләре алды. Узган елның шул ук чоры белән чагыштырганда, һәлакәтләр саны — 42,9 процентка, тән җәрәхәте алучылар 55,6 процентка кимеде, ә һәлак булучылар саны артты, — дип хәбәр итте Фирдүс Фәхретдинов.

Ул шулай ук район юлларындагы авария хәлендәге участокларны атады һәм җаваплы кешеләрдән аларга аерым игътибар бирүләрен сорады.